“Uşaq döş əmərkən tez yorulursa, bu, həmin xəstəliyin əlamətidir” - MÜSAHİBƏ
Uşaq kardiologiyası pediatriyanın çətin və eyni zamanda məsuliyyət tələb edən sahələrindən biridir. Ürək qüsurlu uşaqlara vaxtında diaqnoz qoya bilmək, bu xəstəliyi zamanında aşkarlamaq həkimlərin üzərinə böyük məsuliyyət qoyur. Bəs valideynlər uşaqlarının ürək qüsurlu olduğunu əvvəlcədən necə müəyyən edə bilər, onlar hansı hallarda həkimə müraciət etməlidir? Bu və digər sualları Azərbaycan Tibb Universitetinin Elmi işlər üzrə prorektoru, tibb elmləri doktoru, əməkdar elm xadimi, professor İbrahim İsayev cavablandırır. Aile.lent.az həmin müsahibəni təqdim edir. - Uşaqlarda hansı yaş dövründə kardioloji xəstəliklərə daha çox rast gəlinir? - Uşaqlardakı kardioloji xəstəliklərin yaşla asılılığı daha çoxdur. Son zamanlar anadangəlmə ürək qüsurlu doğulan uşaqları daha çox müşahidə edirik. Sonrakı yaşlarda əsasən məktəbəqədər dövrdə ürək-damar sistemi tərəfindən ilk vaxtlarda aşkar edilməyən anadangəlmə ürək qüsurları, inkişaf uyğunsuzluqları meydan çıxa bilər. Məktəb yaşlarında isə funksional ürək-damar sistemi xəstəliklərinin tezliyi və qazanılma intensivliyi getdikcə artır. - Uşaqların ürək qüsurlu doğulmasında ətraf mühit və digər amillərin nə kimi təsiri var? - Populyasiyada uşaqlarda anadangəlmə ürək qüsurları 0,8-1% təşkil edir. Yəni hər doğulan 100 uşaqdan təqribən birində anadangəlmə ürək qüsuru patalogiyası müşahidə olunur. Bunun da diaqnostikası, yaranma səbəbləri və qarşısının alınması səhiyyəmizin qarşısında duran ən əsas problemlərdən biridir. Bu xəstəliyi hansı səbəblər daha çox yarada bilər sualına gəldikdə isə, deyərdim ki, bu, multifaktorlu, yəni çox səbəbli bir patalogiyadır. Bunun əmələ gəlməsində konkret olaraq hər hansı bir amil əsas rol oynamır. Amma əksər hallada 70-80% genetik faktorun rolu xüsusi vurğulanır. Əgər valideyninin birində ürək-damar sistemində problem varsa, uşaqda da bu, özünü büruzə verəcək. Qalan 20% isə digər səbəblər təşkil edir. Bura əsasən ananın sağlamlıq vəziyyəti, xüsusilə də anada şəkərli diabetin olması, arterial hipertenziyanın, qan azlığının, qəbul edilən dərman preparatlarının, sinir sistemi xəstəliklərinin, böyüdüyü sosial şəraitin, stress, gərginlik, qidalanma kimi amillər də daxildir. Əgər ilk uşaqda anadangəlmə ürək qüsuru varsa, ikinci uşaqda bu, 30%, üçüncü uşaqda isə artıq bu göstəricinin 50% yaranma ehtimalının artdığını demək olar. Yəni valideynlərin, ən əsas da ananın sağlamlığı əsas rol oynayır. - Bu baxımdan analara məsləhətləriniz nədir? - İlk olaraq, valideynlər qüsurlu uşağın doğulmamasına çalışmalıdırlar. Ona görə də ailə qurarkən gənclər mütləq genetik müayinədən keçməlidirlər. Hazırda ölkəmizdə də bununla bağlı ciddi işlər görülür. Hər bir cütlüyün evlənmədən öncə tibbi müayinədən keçməsi mütləqdir. Bu, bir çox xəstəliklərin, eləcə də genetik xəstəliklərin qarşısının alınmasında mühüm əhəmiyyət kəsb edir. İkincisi, oğlan və qız - hər ikisi gələcək ailənin sağlamlığının qorunmasının qeydinə qalmalıdır. Zərərli amillərdən kənar olmaq vacib şərtdir. Bunlardan başlıcası isə narkotik vasitələrindən, geni dəyişdirilmiş modifikasiya olunmuş qida məhsullarından (GMO), yarımfabrikatlardan qorunmaqdır. Əsasən qız uşaqları üçün bu amillər vacibdir. Bəzi analar qızlarının uşaq vaxtı hansısa xəstəliyi keçirib-keçirmədiyinə heç fikir vermirlər. Amma onlar bilməlidir ki, bunun da gələcəkdə hansısa xəstəliyin yaranmasında birbaşa rolu vardır. Hətta uşaqlıq dövründə həddən artıq günəş şüaları qəbul etmək də gələcəkdə genetik xəstəliyin yaranmasında başlıca faktordur. Analar ilk olaraq sağlam həyat tərzi tədbirlərinin gücləndirilməsinə çalışmalıdırlar. İkincisi isə, uşaqlarda anadangəlmə ürək qüsurlarının olmaması üçün hamiləlik zamanı dölün ürəyinin vəziyyətinin yoxlanılmasıdır. Bu hallarda 12-ci və 20-ci həftədə dölün ürəyində olan qüsuru hal-hazırki Fetal exokardioqrafiya (Fetal Exo) ilə yoxlamaq mümkündür. Yəni bu zaman uşaq hələ ana bətnində ikən onda ürək qüsurunun olub-olmaması aşkar edilə bilər. - Əgər uşaq hələ ana bətnində olarkən belə qüsur aşkarlanarsa, nə kimi tədbirlər görülə bilər? - Əsas effektiv tədbir bətndaxili dövrdə dölün ürəyində olan patalogiyanın həyatla uyuşmazlığıdır. Əgər kobud qüsur varsa, yəni sonradan korreksiyası mümkün deyilsə, bu zaman hamiləliyin pozulması məsləhət görülür. Ya ana uşağın belə ağır qüsurla dünyaya gəlməsinə razı olmalıdır və sonradan bu problemlə mübarizə aparmalıdır, ya da hamiləliyə son verməlidir. Son vaxtlar Azərbaycanda insanlar arasında qəribə bir tendensiya var, hər kəsi övladının cinsiyyəti maraqlandırır, hətta imkan olmasa belə, bunun üçün maddi vəsait axtarıb tapırlar. Amma həmin hamilə qadın bir dəfə də olsun USM-də uşağının ürəyində hansısa bir problemin olub-olmadığını yoxlatdırmır. Analar bilməlidir ki, 20 həftəyə qədər ürək tam formalaşır, bunu da yoxlatdırıb hansısa bir problemin olub-olmadığını bilmək vacib şərtdir. Bu zaman yarana biləcək ağır qüsurların qarşısını almaq olar. - Elə olubmu ki, belə bir hal aşkar edilsin və həmin ana hamiləliyi davam etdirməkdən imtina etsin. - Bəli, bununla bağlı hətta statistik göstəricilər də var. Hamilə qadın mütləq hamiləliyin ilk mərhələsində Fetal exokardioqrafiyadan (Fetal Exo) keçib, dölün ürəyinin vəziyyətini yoxlatdırmalıdır. Əgər dölün ürəyinin vəziyyətində həyati uyuşmaz qüsur varsa, bu, valideynə mütləq şəkildə çatdırılır. Son qərar isə əlbəttə ki, valideynin özündən asılıdır. Mən həkimlik fəaliyyətim dövründə hələ ki belə bir vəziyyətlə qarşılaşmamışam. - Valideynlər uşaqlarda hansı əlamətlərinə görə anadangəlmə ürək qüsurunun olduğunu müəyyən edə bilərlər? - İlk olaraq qeyd edim ki, hamiləlik dövründə analar uşağın hərəkətinin necə olmasından, həmçinin müayinələr zamanı bunu müəyyən edə bilər. Müayinə zamanı dölün də ürək döyüntülərinin olub-olmaması və necə formalaşmasını yoxlatdırmaq vacib şərtdir. Uşaq anadan olandan sonra onun inkişafdan geri qalması həmin uşaqda ürək qüsurunun olmasının göstəricilərindən biridir. Uşaq ananın döşünü əmərkən tez yorulursa, 15 dəqiqədən az əmirsə, bu, ürək-damar sistemində patalogiyanın olmasını göstərir. Bu, ilk əlamət sayılır. Bəzən bunun tənəffüs patalogiyasından da asılı olduğunu deyə bilərik. Çəkinin, boyun ləng artması, uşağın başını gec tutması, gec iməkləməsi, qucağa meyllik, adi bir hərəkətdə uşağın rənginin dəyişməsi və s. kimi hallar da onda bu xəstəliyin əlamətlərinin başlıca göstəriciləridir. Ürək qüsurları iki qrupa bölünür: ağ və göy qüsurlar. Bu qüsurların da özünün ortaya çıxma əlaməti var. Göy qüsurlar asanlıqla aşkar oluna bilər. Belə ki, uşaq ağladığı zaman bunu müəyyən etmək olur. Amma digərində isə valideynlər daha diqqətli olmalıdırlar. Uşağın inkişafına və buna uyğun olaraq çəki artımına fikir verməlidirlər. Ən əsası isə uşağın tez-tez xəstələnməsidir. Bunu bəzən analar soyuqdəymə kimi qəbul edirlər. Amma ola bilsin ki, bu da ürəkdə olan problemlə əlaqədardır. - Belə uşaqları müalicə etmək mümkündürmü? - Anadangəlmə ürək qüsurları özü də ağırlıq dərəcəsinə görə bölünür. Elə uşaqlar var ki, onlara anadan olan kimi cərrahi müdaxilənin edilməsi mütləqdir, amma elə problemlər var ki, onlar 1 yaşa qədər gözlənilməlidir. Uşaqlarda yüngül qüsurlar zamanı onları tez-tez müayinələrdən keçirtməklə gələcəkdə yarana biləcək fəsadların qarşısını almaq olar. Valideynlər uşaqlarını 5 yaşına qədər ildə bir dəfə mütləq kardioloji müayinədən keçirtməlidirlər. Çünki uşaqların vaxtında müayinəyə gətirilməsi bir çox problemlərin zamanında aşkarlanmasına və buna qarşı effektiv tədbirlərin görülməsinə köməklik edəcəkdir. Uşaqların özü tərəfindən olan hansısa bir şikayəti isə valideyn qulaqardına vurmamalıdır. Şikayət hansısa bir bədən üzvündə funksional deyil, üzvi dəyişiklik əmələ gəlməklə başlaya bilər. Bu zaman ürək öz funksiyasını lazımınca yerinə yetirə bilmək iqtidarında olmayacaqdır. - Məktəb yaşlı uşaqlarda ürək xəstəlikləri sırasında ən geniş yayılmışı hansıdır? - Uşaqlarda arasında anadangəlmə ürək qüsurlarından sonra ən çox yayılan xəstəlik növü aritmiyalardır. Hələ 20-30 il əvvəl heç kim uşaqlarda aritmiyanın olmasını ağlına belə, gətirə bilməzdi. Hal-hazırda uşaqlar arasında aritmiya, işemiya (infarkt) hallarına daha çox rast gəlinir. Böyüklərdən fərqli olaraq, uşaqların ürəyi işemiyaya dözümlü olur. Ona görə də əvvəllər diaqnoz qoymaq çətin olurdu. Amma indi səhiyyəmiz daha sürətlə inkişaf edir, bir çox xəstəxanalarımız müasir standartlara cavab verən cihazlarla təmin olunub. Bunun sayəsində biz uşaqlarda hələ ana bətnində olarkən belə qüsurları - işemiyaları aşkarlaya bilirik. Aritmiyalar əksər vaxtlarda sonradan qazanılmış patalogiyalar hesab olunur. Aritmiyaların əmələ gəlməsində əsas səbəblər isə uşağın keçirdiyi xəstəliklər, sinir amili pozulması, vegetativ pozğunluqlardır. - Azərbaycanda uşaq kardiologiyası sahəsində hansısa yeniliklər varmı? - Ölkəmizdə uşaq kardiologiyası son zamanlar tibbin ən yüksək səviyyəyə qədər çatmış sahələrindən biridir. Klinikamızda Uşaq Kardioloji funksional kabineti fəaliyyət göstərir. Və biz bu kabinetdə olan avadanlıqlar sayəsində uşaqlara vaxtında, düzgün diaqnoz qoymaq imkanına sahibik. (lent.az)
