Bu dondurmalar uşaqda angina yarada bilər – PEDİATR XƏBƏRDARLIĞI

Həkim ilk növbədə uşaqlara ucuz dondurma verməyi məsləhət görmür. Çünki ucuz məhsul keyfiyyətsiz olur, üstəlik, uzun müddət qalması üçün buzlandırılan dondurma uşaqların xəstələnməsinə səbəb olur: "Əsasən meyvəli dondurmalara üstünlük vermək lazımdır. Çünki faydalıdır. Lakin çox zaman bu cür keyfiyyətli dondurmalar baha olur və valideynlərin büdcəsinə uyğun gəlmir. Bütün hallarda uşaqlara dondurma otaq temperaturunda verilsə, yaxşıdır. Xüsusən, tez-tez xəstələnən və məktəbəqədər yaşda olan uşaqlara dondurma vermək mövzusunda ehtiyatlı olmaq lazımdır. Soyuq dondurma angina yaradır. Bir neçə angina epizodu isə revmatizmi qaçılmaz edir”.

Mütəxəssis uşaqları psixoloji baxımdan dondurmadan məhrum etməməyi də tapşırır. Bu halda isə ən yaxşı çıxış yolu anaların evdə dondurma hazırlamasıdır. Ev şəraitində hazırlanan dondurmalar həm daha keyfiyyətli olacaq, həm də xəstəlik yaratma ehtimalı azalacaq. Həkim bildirir ki, 10-12 yaşdan sonra dondurmanın xəstəlik yaratma təhlükəsi azalır. Amma yenə də dondurmanın üzərindəki buzu yemək olmaz.

Dietoloq Tutu Zeynalova da uşaqları sevdiyi qidadan məhrum etməyi məsləhət görmür. Gün ərzində 100 qramı keçməmək şərtilə dondurmanın dadına baxa bilərlər: "Valideynlər uşaqlara daha çox soyuqdəyməyə görə dondurma yeməyə qadağa qoyurlar. Lakin həkimlər tərəfindən "uşaqlar dondurma yeməsin”, - deyə göstəriş yoxdur. Hər uşaq eyni deyil. Elə uşaqlar var ki, immun sistemi zəifdir, tez-tez soyuq dəyir, soyuğa həssasdırlar, ona görə də onlara daha az dondurma yemək tövsiyə edirik. Lakin indi tibb inkişaf edib. Hətta boğaz əti kəsildikdən dərhal sonra soyuducu effekt üçün dondurma verirlər”.